سپورتتىق ءىس-شارانىڭ اشىلۋ سالتاناتىنا قر پارلامەنتى ءماجىلىسىنىڭ دەپۋتاتى ماقپال تاجماعانبەتوۆا, ازىرەت سۇلتان مەشىتىنىڭ باس يمامى ەربولات نۇرىلدا ۇلى, دەنە مۇمكىندىگى شەكتەۋلى تۇلعالارعا ارنالعان سپورتتىق دايارلاۋ ورتالىعىنىڭ ورىنباسارى ومىرزاقوۆ ءادىلحان, «كوزىمنىڭ قاراسى» مۇگەدەكتەر قوعامدىق بىرلەستىگىنىڭ توراعاسى ءجۇزباي سەرىك ۇلى قاتىستى.
استانا قالاسىندا ءبىرىنشى رەت وتكىزىلىپ جاتقان جارىس, الداعى ۋاقىتتا ەلىمىزدىڭ باسقا دا وڭىرلەرىندە وتكىزىلەدى.
«بۇرىننان ىزدەنىستە ءجۇرىپ, شەت مەملەكەتتەردەن وسىنى قاراپ, زەرتتەپ قازاقستانعا قالاي اكەلسەم ەكەن دەگەن وي بولدى. بۇل چەمپيونات وسى استانا قالاسىندا وتكىزىلگەننەن كەيىن, الداعى ۋاقىتتا 13-ءشى دۇنيەجۇزىلىك زاعيپ جاندار كۇنىنە وراي رەسپۋبليكالىق تۋرنير وتكىزەمىز», دەدى «كوزىمنىڭ قاراسى» مۇگەدەكتەر قوعامدىق بىرلەستىگىنىڭ توراعاسى ءجۇزباي سەرىك ۇلى.
شارانىڭ ماقساتى - الەمدىك دەڭگەيدەگى جارىستارعا قاتىسۋ ءۇشىن وتاندىق قۇراما كوماندا جاساقتاۋ.
ال, مامانداردىڭ ايتۋىنشا, كانادا, گەرمانيا, بولگاريا سياقتى شەت مەملەكەتتەردە جاقسى دامىعان بۇل سپورت ءتۇرى كوز جانارىنان ايىرىلعان زاعيپ جانداردىڭ دەنساۋلىعىنا پايدالى. ياعني, ەستۋ قابىلەتىمەن, قول مەن اياق قوزعالىسى قىزمەتىنىڭ جۇمىسىن ارتتىرادى.
رەسپۋبليكا كۇنىنە وراي ۇيىمداستىرىلعان چەمپيوناتتىڭ جەڭىمپازدارى ارنايى ديپلومدارمەن, مەدالدارمەن, سىيلىقتارمەن ماراپاتتالدى. سونىمەن قاتار بارشا قاتىسۋشىلارعا دەمەۋشىلەر تاراپىنان اقشالاي قاراجات تابىستالدى.
